በኤልያስ ከድር  የክስ መዝገብ በይግባኝ የእስር ቅጣታቸው ወደ 3አመት ከ 4ወር የተቀነሰላቸው 8  ወንድሞች ከዝዋይ ማ/ቤት መለቀቃቸው ተገለፀ

ፍትህ ራዲዬ/ ታህሳስ 28/2009
۩○◙◙○◙◙○◙◙○◙◙○۩

ከአዲስ አበባ እና ከወልቂጤ ከተማ ተይዘው በኤልያስ ከድር የክስ መዝገብ በሽብር ወንጀል ተከሰው ከ 3 አመታት በላይ በግፍ እስር እና ስቃይ ያሳለፉት ወንድሞች ባቀረቡት ይግባኝ መሰረት ተበይኖባቸው የነበረው የ 7 አመት ግፍ እስራት ወደ 3 አመት ከ 4 ወራት ዝቅ እንዲል በተወሰነላቸው መሰረት እንደሚፈቱ መገለፁ ይታወሳል፡፡

እንዲፈቱ ከተወሰነላቸው ወንድሞች መካከል የመዝገቡ ተጠሪ ወንድም ኤልያስ ከድርን ጨምሮ በዝዋይ ማረሚያ ቤት ታስረው የነበሩ 8 ወንድሞች  በዛሬው እለት ከእስር መፈታታቸውን  የፍትህ ራዲዬ ባልደረቦች ዘግበዋል፡፡

ፍርድ ቤቱ የቅጣት ውሳኔውን ዝቅ ካደረገላቸው ቡኋላ የተያዙበት ቀን ታሳቢ እየተደረገ ከእስር እንደሚለቀቁ ጠበቃቸው አዲስ መሐመድ ለፍትህ ራዲዬ መግለፆ የሚታወስ ሲሆን ወንድም ኤልያስ ከድር እና ሌሎች 8 ወንድሞች  በዚሁ መሰረት በዛሬው እለት መፈታታቸው ተገልፆል፡፡

የታሳሪ ቤተሰቦች የፍርድ ቤቱን ውሳኔ ከሰሙ ወዲህ ወደ ማረሚያ ቤቱ በመሄድ በተደጋጋሚ ይፈታሉ ብለው ቢጠብቁም ከማረሚያ ቤቱ በኩል ምንም ፍንጭ ሊያገኙ ባመለመቻላቸው በትዕግስት ሲጠባበቁ መቆየታቸው ታውቋል፡

ከ3 አመት ከ4 ወራት በላይ በማዕከላዊ፣በቂሊንጦ፣በዝዋይ እና በቃሊቲ ማረሚያ ቤት በግፍ እስር ሲንገላቱ የቆዩት እነዚህ  ወጣቶች በዛሬው እለት ከእስር ተፈተው ከቤተሰባቸው  ጋር መቀላቀላቸው  ተገልፆል፡፡

የመዝገቡ ተጠሪ ወንድም ኤልያስ ከድር በሽብር ወንጀል ክስ ተመስርቶበትም ተስፋ ባለመቁረጥ የትዳር አጋር የምትሆነውን እህት መዲናን በቂሊንጦ ማረሚያ ቤት ሆኖ የኒካህ ስነ ስርአቱን ማከናወኑ የሚታወስ ሲሆን በእስር ጨለማ ውስጥ ሆኖም ሩቅ በማሰብ ኒካህ ማሰሩ ለብዙ ወጣቶች አርአያ እንደሆን ማስቻሉ ተዘግቧል፡፤

ለዲኑ ሲለፋ የነበረውን ወንድም ኤልያስ ከድር እና ሌሎች አብረውት የታሰሩት ወንድሞች  በዛሬው እለት ታህሳስ 28 የተሃድሶ ስልጠና ተሰጥቶቷቸው  ከእስር መፈታታቸው  የተዘገበ ሲሆን  በእስር ላይ የቀሩትን ቀሪ ሙስሊሞችም ሙስሊሙ በዱዓ እንዲያግዛቸው ጥሪ መቅረቡ ታውቋል፡፡

ተጨማሪ ምስል