በትግራይ ክልል በራያ አዘቦ ወረዳ የታሰሩት ኡለሞች እና ኡስታዞች ጉዳያቸውን የያዙት ዳኞች እና አቃቤ ህጎች ብቁ ለመሆናችሁ ማረጋገጫ ማቅረብ አለባቸው በመባሉ በድጋሚ ለየካቲት 13 ተለዋጭ ቀጠሮ ተሰጣቸው

 ፍትህ ራዲዬ/ ጥር 20/2009

۩○◙◙○◙◙○◙◙○◙◙○۩

በትግራይ ክልል በደቡባዊ ዞን በራያ አዘቦ ዋሃቢያ ናችሁ በሚል ለእስር  የተዳረጉት ኡለሞች እና ኡስታዞች  በቀነ ቀሯቸው መሰረት ጥር 18 ፍርድ ቤት መቅረባቸውን  የፍትህ ራዲዬ ባልደረቦች ዘግበዋል፡፡

ኡለሞቹ እና ኡስታዞቹ በራያ አዘቦ ወረዳ ኩኩፍቶ በተባለ ቦታ  የተያዙ ሲሆን ማይጨው በሚገኘው ማዕከላዊ እስር ቤት  ታስረው እንደሚገኙ ይታወቃል፡፡

ከታሰሩት ኡለሞች እና ኡስታዞች መካከል ከሳኡዲ አረቢያ ለቤተሰብ ጥየቃ ወደ ሃገራቸው የተመለሱት ኡስታዝ አብዱልመናንን ጨምሮ በአፍሪካ ቲቪ የትግርኛ ዳዕዋ በማድረግ የሚታወቀው ኡስታዝ ከድር ሁሴን፣ሼህ አህመድ ዩሱፍ እና ሌሎችም ሙስሊሞች በግፍ ታስረው እየተሰቃዩ መሆኑን የፍትህ ራዲዬ መዘገቧ ይታወሳል፡፡

አቃቤ ህጉ ካቀረበባቸው ክስ መካከል  ቅሬ(እድር) ላይ አትሳተፉም፣ ዋሃቢያ ናችሁ፣ አብደላህ አል ሃረሪን አትቀበሉም፣ልጆች መልምላችሁ ወደ ሳኡዲ አረቢያ ትልካላችሁ  የሚሉን አሳፋሪ የሃሰት ክሶች እንደሚገኙበት መዘገባችን ይታወሳል፡፡

የመንግስት አቃቤ ህግ የሆነው አቶ ኢድሪስ ጀማል  የሃሰት ምስክሮቹን ለማቅረብ በመቸገሩ ከዳኞቹ ጋር በመነጋገር ተከሳሾችም ሆኑ ጠበቆቻቸው ባልተገኙበት ቀነ ቀጠሮው ወደ ጥር 18 እንዲዘዋወር መደረጉን የሚገልፅ ብጣሽ ወረቀት በፍርድ ቤቱ ማስታወቂያ ቦርድ ላይ ማስለጠፉን መዘገባችን ይታወሳል፡፡

ቀነ ቀጠሮውን ያለህግ አግባብ እንዲዘዋወር በመደረጉ የታሳሪ ቤተሰቦች ቅሬታቸውን ወደመቀሌ ከፍተኛው ፍርድ ቤት በመሄድ  ቢያቀርቡም  የመቀሌ ከፍተኛው ፍርድ ቤት ፕሬዝደንት የሆነው አቶ ዘነበ አቤቱታውን ባቀረቡት ቤተሰቦች ላይ ከፍተኛ ማስፈራሪያ እና ዛቻ እንደፈፀመበቸው መዘገባችን ይታወሳል ፡፡

አቶ ዘነበ ለተከሳሽ ቤተሰቦች ይህ ጉዳይ በቀጥታ እኔ እና የትግራይ ክልል ርዕሰ መስተዳደሩ አቶ አባይ ወልዱ በቅርበት  እየተከታተልነው ነው፡፡ ዳግመኛ እንዲህ አይነት ጥያቄ ብታቀርቡ ለእስር እንደምትዳረጉ ማወቅ አለባችሁ፡፡ ሁላችሁንም መልካችሁን በደንብ ተመልክቻለው፡፡ምንም አይነት ነገር ቢፈጠር ለወረዳው ፖሊስ በማሳወቅ አሳስራቹሃለው በማለት የታሳሪ ቤተሰቦችን ማስፈራራቱ ተዘግቧል፡፡

 በሼህ አብዱልመናን መዝገብ የተከሰሱት እነዚህ  ሙስሊሞች በቀነ ቀጠሯቸው መሰረት ጥር 18 ፍርድ ቤት ቀርበው የነበረ ሲሆን ጉዳያቸውን እየተመለከቱት የሚገኙት የፍርድ ቤቱ ዳኞች እና አቃቤ ህጉ የሽብር ክስ ለመመርመር ብቁ ኣይደላችሁም፣ የፌደራል ጸረ ሽብር ስልጠና አልወሰዳችሁም  በመሆኑም ይህን ጉዳይ ለመመርመር ብቁ መሆናችሁን የሚያረጋግጥ ሴርትፍከት ካላችሁ ኣቅርቡ የሚል ጥያቄ በተከሳሽ ጠበቆች በኩል ጥያቄ በችሎቱ መቅረቡ ችሎቱን የተከታተሉ ሙስሊሞች ለፍትህ ራዲዬ ገልፀዋል፡፡

የተከሳሽ ጠበቃ ባቀረቡት አቤቱታም ቀነ ቀጠሮ ለየካቲት 13 ተለዋጭ ቀጠሮ መሰጠቱ ተዘግቧል፡፡

በሼህ አብዱልመናን መዝገብ የተከሰሱት እነዚህ  ሙስሊሞች ያለበቂ መስረጃ ለእስራ ከተዳረጉ ድፍን አንድ አመት ሊሞላቸው መሆኑ የተገለጸ ሲሆን በሐሰት ተወንጅለው በቀነ ቀጠሮ በማረሚያ ቤት እየተሰቃዩ እንደሚገኙ ታውቋል፡፡

ተጨማሪ ምስል