በወገኖቻን እልቂት የተሰማንን መሪር ሐዘን እንገልፃለን!!!
ለተጎጂ ቤተሰቦችና ለመላው ኢትዮጵያውያን መፅናናትን እንመኛለን!
ግፍ ማለፉ ብቻ ሳይሆን ድልን አስከትሎ መመጣቱ አይቀርምና ኢትዮጵያዊያን ለፍትህ፣ ለነጻነት እና ለሰላም የምናደርገው ትግል ተጠናክሮ ይቀጥላል!!!! 
ረቡእ መስከረም 25/2009

ከመንግስት በርካታ ኃላፊነቶች መካከል የአገርን ህልውና እና የህዝብን ሰላም ማስጠበቅ ቀዳሚዎቹ ናቸው። በአገራችን ያለው ግን ከዚህ በተቃራኒ ነው። በሚያሳዝን መልኩ በአገራችን እየተከሰቱ ያሉ ሰላም የሚያደፈርሱና ህልውናችንን አደጋ ላይ የሚጥሉ ክስተቶች በአብዛኛው ምንጫቸው መንግስት ሆኖ እናገኘዋለን። ከሰሞኑም ኃላፊነት በጎደለው የመንግስት እርምጃ በርካታ ዜጎቻችን በአሰቃቂ ሁኔታ ለሞት ተዳርገዋል። ይህ ድርጊት በየትኛውም መመዘኛ በጽኑው የሚወገዝ ሲሆን ስርዓቱ ምንግዜም ከስህተቱ የማይማር፣ ሰላማዊ ጥያቄን ከሚያነሱ ዜጎች ጋር ለመግባባት ከኃይል እና አፈሙዝ ውጭ ሌላ ቋንቋ እንደሌለው በግልጽ የሚያሳይ ነው። የዜጎችን መብት በኃይል ረግጦ እና ፍላጎታቸውን አፍኖ ለመያዝ የሚታትር ስርዓት እድሜው ረጅም እንደማይሆንም የሚያጠያይቅ አይደለም።

በህዝቦች ላይ ጭቆናው ሲበረታና ግፉ ከሚሸከሙት በላይ ሲሆን ጠንክረው ከመታገል ውጪ አማራጭ እንደሌላቸው ይገነዘባሉ። በዚህም ራሳቸውን ለተሻለ ትግልና መስዋእትነት ያዘጋጃሉ። አለመታገል ከስቃይ እና እንግልት በማያድኑበት ተጨባጭ ሁኔታ መታገል አማራጭ ሳይሆን የህልውና ዋስትናም ጭምር ነው። የሚከፈለው መስዋዕትነት የቱንም አይነት ይዘት ይኑረው በዳዩን ስርዓት አምርረው ይታገሉታል። ይህ ሁኔታ በየትኛውም አይነት የትግል መስመር ውስጥ የሚኖር ሲሆን ታሪክም ይህንኑ እውነታ ያስተምረናል።

ከሰሞኑ በቢሾፍቱ (ደብረ ዘይት) የተፈጠረው አሳዛኝ ክስተት ማቆሚያ ያልተበጀለት የመንግስታዊው ጥቁር ሽብር ውጤት ነው። ይህ ክስተት በአገራችን ታሪክ በህዝብ ላይ የማይሽር ጠባሳ ጥለው ካለፉ አሳዛኝ ክስተቶች መካከል አንዱ ሆኖ ዘወትር ሊታወስ በታሪክ ተመዝግቧል፡፡ በጋምቤላ፣ በቤኒሻንጉል፣ በአማራ፣ በኦሮሚያ፣ በአፋር እና በሶማሊያ ክልሎች ላለፉት አምስት ዓመታት በመላው ሙስሊሙ ህብረተሰብ ላይ እየደረሰ ያለው የመብት ረገጣ እና የሰላማዊ ዜጎች ህልፈት ትምህርት አልሆን ብሎ ዛሬም ዘግናኝ የመንግስት አረመኔያዊ እርምጃዎች ቀጥለው እያየን ነው። መንግስት አሁንም ድረስ ውስጡን ከመፈተሽ ይልቅ ህዝብ የሚያውቀውን እውነታ በማድበስበስ እጁን ወደሌሎች ለመቀሰር መሞከሩ በህዝብ ዘንድ የማይበርድ ቁጭት የሚፈጥር ኃላፊነት የጎደለው ተግባር መሆኑ አያጠራጥርም።

ከዚህ አሳዛኝ ክስተት ማግስት ከህዝብ ተነጥቀው የስርዓቱ የፕሮፓጋንዳ ማራመጃ በተደረጉ የህዝብ ሚዲያዎች የሚሰነዘሩት ሃሳቦች ሐዘን ባቆሰለው ህዝብ ላይ ሌላ ድርብ ህመም የሚፈጥሩ ናቸው። ይህ ግን የመታገልን ስሜት የሚገነባ እንጂ የፍርሃት ድባብን በፍፁም አያነግስም። ከታሪክ እንደተማርነው ልክ እንደ ትላንቱ ሁሉ ዛሬም ሆነ ወደፊት የአምባገነኖች የግፍ እርምጃ የህዝብን ትግል ቢያጎለብት እንጂ በጭራሽ ወደኋላ አይመልስም። የአገርን ደህንነት እና የህዝብን እልቂት ለመታደግ አማራጩ አንድ እና አንድ ብቻ ነው - ስርዓቱ በህዝብ ላይ እያደረሰ ያለውን አረመኔያዊ ድርጊት በአስቸኳይ አቁሞ እና አገሪቱን ወደቀውስ ከሚመራ ተግባሩ ተቆጥቦ ለህዝብ ድምፅ ጆሮውን መስጠት ብቻ!!!

የኢትዮጵያ ህዝቦች የቱንም ያክል ድምጻቸውን ከፍ አድርገው እና ደጋግመው ቢያሰሙም የስርዓቱ ተደጋጋሚ መልስ የሚወስዳቸውን የሃይል እርምጃ ከማጠናከር ውጭ ሌላ ሊሆን አልቻለም። በዚህ መልኩ የሚኖረው እድሜ ረጅም ሊሆን አይችልም። በዚህ ነባራዊ ሁኔታ በህዝቦች መካከል ያለውን አንድነት፣ ትብብር እና እርስ በርስ መግባባት ማጠናከር እንዳለ ሆኖ ህዝቦች በቀጣይ እንድትኖራቸው በሚፈልጓት ኢትዮጵያ ዙሪያ በሰፊው ሊመክሩ እንደሚገባ እናሳስባለን።

ኃላፊነት የጎደለውን የመንግስት አረመኔያዊ ድርጊት አጥብቀን እናወግዛለን! በሰላማዊ ወገኖቻችን ላይ በደረሰው እልቂት የተሰማንን መሪር ሐዘን እየገለፅን ለተጎጂ ቤተሰቦች እና ለመላው ኢትዮጵያውያንም መፅናናትን እንመኛለን!

መንግስታዊው ግፍ ይብቃ!
ትግላችን በአላህ ፍቃድ እስከድል ደጃፎች ይቀጥላል!
ድምፃችን ይሰማል!
አላሁ አክበር!