ለቅጣት ውሳኔ የተቀጠሩት በአህመድ ኢድሪስ የክስ መዝገብ በሽብር የተከሰሱት የደሴ ወጣቶች ለጥር 18 ተለዋጭ ቀጠሮ ተሰጣቸው
ፍትህ ራዲዬ/ ጥር 9/2009
۩○◙◙○◙◙○◙◙○◙◙○۩

በደሴ ከተማ ከ 3 አመት በፊት በመንግስት ደህንነቶች አቀናባሪነት የተገደሉትን ሼህ ኑሩን ገድላቹሃል በሚል ሰበብ እና በሽብር ተግባ ላይ ተንቀሳቅሰዋል በሚል ከደሴ ከተማ ለእስር የተዳረጉት በአህመድ ኢድሪስ የክስ መዝገብ የሚገኙት  13 ወጣት ሙስሊሞች  በቀነ ቀጠሯቸው መሰረት በዛሬው  እለት ጥር 9  የፌደራሉ ከፍተኛው ፍርድ ቤት 19ኛው ወንጀል ችሎት ቀርበው እንደነበር የፍትህ ራዲዬ ባልደረቦች ዘግበዋል፡፡

አቃቤ ህጉ በፀረ ሽብር አዋጅ 652/2001 አንቀጵ 6/1 እንዲሁም 6/7 በመወንጀል የተወሰኑትን ወጣቶች ሼህ ኑር ይማምን ገድላቹሃል፣ኢስላማዊ መንግስት ልትመሰርቱ ነበር እና በደሴ ከተማ ሲካሄዱ የነበሩ የሰደቃ እና አንድነት መድረኮች ላይ ተሳትፋቹሃል በማለት በሃሰት ክስ እንደተመሰረተባቸው ይታወቃል፡፡

ፍርድ ቤቱ ያቀረቡትን የመከላከያ ማስረጃ በመመርመር  የቀረበባቸውን  በፀረ ሽብር አዋጅ 652/2001 አንቀጵ 3 እና 1 እንዲሁም አንቀጵ 6 እና 7 በመተላለፍ የሚለውን ክስ  በመመርመር በሁሉም ተከሳሾች ላይ የጥፋተኝነት ውሳኔ በታህሳስ 27 ነበረበው ችሎት ማስተላለፉን መዘገባችን ይታወሳል፡፡  

ከመዝገቡ ተከሳሽ ከሆኑት መካከል በአምስቱ ላይ ቀርቦባቸው የነበረውም የሽብር ክስ ዝቅ በማድረግ በሌላ አነስተኛ አንቀፅ ጥፈተኛ በሚል ብይን ያስተላለፈባቸው ሲሆን እነሱም  አብዱራህማን እሸቱ ፣  ኢብራሒም ሙሔ ፣ እስማኤል ሀሰን .አብዱ ሀሰን፣ እና አህመድ ጀማል ሰይድ መሆናቸው ይታወቃል፡፡

በፀረ ሽብር ህጉ  ከፍተኛ የእስር ቅጣት በሚያስበይነው በአንቀፅ  4  አራት የሚሆኑት ወንድሞቻችን ጥፋተኛ የተባሉ ሲሆን እነሱም በሼህ ኑሩ ግድያ በቀጥታ ተሳታፊ ሆነዋል በሚል መሆኑ ተዘግቧል።እነዚህ አራት ሙስሊም ወንድሞቻችን በቅርቡ የቂሊንጦ ማ/ቤትን አቃጥለሃል በሚል ተጨማሪ የሽብር ክስ የተመሰረተበትን ወንድም ኡመር ሁሴንን ጨምሮ አንዋር ኡመር፣ ሷሊህ መሀመድ እና ይመር ሁሴን እንደሚገኙበት መዘገባችን ይታወሳል፡፡

በተቀሩት አራት ተከሳሾች ላይ ማለትም የመዝገቡ ተጠሪ አህመድ ኢድሪስ ፣ አደም አራጋው ፣ ከማል ሁሴን  እና ሙሀመድ ዩሱፍ  በፀረ ሽብር ህጉ በአንቀፅ 7/1 እና በአንቀጵ 5 ጥፋተኛ መባላቸውን ከዚህ ቀደም መዘገባችን ይታወሳል፡፡

ለ3 አመታት በቀነ ቀጠሮ ሲንጓተት የነበረው የፍርድ ቤት ሂደት በታህሳስ 27 ችሎት  በሁሉም ተከሳሾች ላይ የጥፋተኝነት ብይን በማስተላለፍ የተጠናቀቀ ሲሆን ተከሳሾች እና አቃቤ ህጉ የቅጣት ማቅለኛ እና ማክበጃቸውን ለፍርድ ቤቱ እንዲያስገቡ  ትዕዛዝ  ተሰጥቶ ለዛሬ ጥር 9 የመጨረሻ የቅጣት ውሳኔውን ለማስተላለፍ ቀነ ቀጠሮ መስጠቱ ይታወቃል፡፡

በዛሬው ችሎትም ለቅጣት ማቅለያነት ከቀረበው መካከል የህክምና ማስረጃዎች አብረው ተያይዘው አልቀረቡም በሚል በ  ፍርድ ቤቱ የመጨረሻውን የቅጣት ውሳኔውን ለመስጠት ለጥር 18 ተለዋጭ ቀጠሮ መስጠቱን የፍትህ ራዲዬ ባልደረቦች ዘግበዋል፡፡

በዛሬው ችሎት ከፍተኛ ቁጥር ያለው ህዝበ ሙስሊም  በፍርድ ቤቱ መገኘቱ  የተገለፀ ሲሆን  ተከሳሾቹ የቅጣት ውሳኔውን ለመስማት የፊታችን ጥር 18 ዳግም ፍ/ቤት ይቀርባሉ ተብሎ እንደሚጠበቅ ተገልፆል፡፡

ተጨማሪ ምስል